Kuyamis sports fest gibuksan

MISAMIS Oriental--Ang paugnat sa kusog maoy usa sa mga tinubdan sa mga matarong, matinud-anon ug positibong mga hiyas sa kinabuhi.

Kini, matud pa ni Gobernador Bambi Emano atul sa pag bukas sa Kuyamis Sports Fest nga diha sa Don Gregorio Pelaez Sports Center, Oktubre 29.

Gibutyag sa gobernador ang iyang tinguha nga makakaplag sa mga umaabot nga mga kampeon sa nagkalain-laing mga dula gikan niining maong programa sa paugnat sa kusog.     

Apil usab sa maong tinguha nga ang mga magdudula nga magpakita sa ilang  kahanas niining Kuyamis Sports Fest, mahatagan sa mga incentive sama sa scholarship sa pag eskwela, maayong mga “coach” ug “world standard” nga pasilidades.

Kabahin sa “rehabilitation, repair ug pag bag-o sa Pelaez Sports Center, si Emano nagkanayon nga pipila na ka mga tanyag gikan sa pribadong sektor ang karon anaa na sa buhatan sa Misamis Orientyal Integrated Sports Council (MOISC) ubos ni kanhi Kagawad Prexy Elipe, kinsa mao ang general manager sa MOISC.

Ang resulta sa mga dula mao kining mosunod: sa  dulang Volleyball (Women), mga magdudula gikan sa lungsod sa Jasaan mihulang mananaug batuk sa mga magdudula sa Lagonglong; Volleyball (men), Talisayan midaugh batuk Lagonglong; Basketball, mga magdudula nag edad 14 anyos paubos: Talisayan midaug batuk Opol; Basketball (open), Talisayan midaug batuk Opol; ug Opol midaug batuk Laguindingan.

Ang Kuyamis Sports Fest gi-salmotan sa mga magdudula gikan sa mga kalungsuran sa lalawigan. Kining maong mga dula himoon matag adlawng Sabado, Domingo ug mga piyesta opisyal aron mahatagan ang tanan sa kahigayonan sa pag dula.

Ang “championship round” himoon atul unya sa pagsaulog sa Kuyamis Festival sa sayong bahin sa sunod tuig, 2017. (PIO MisOr)